Res Retica

Hoxe escoitando en Radio 3 a gravación do concerto que Kiko Veneno deu en Arzúa dentro da Feira gastronómico-cultural do Queixo (denominación de orixe Arzúa-Ulloa) descubrín que este mestre da rumba-rock vaise convertir nun novo desertor da industria discográfica. Para espanto de teddybautistas de pro, a fuga continúa e Kiko vai seguir a estela de tantos outros músicos e bandas que renuncian a traballar coas discográficas e dan o paso, ao tempo cara atrás (autoeditarse) e cara adiante (distribuir directamente en Internet), de vender directamente a súa música sen intermediarios (discográficas, distribuidoras, tendas). Como ben explicaban os locutores de Radio3, os músicos recoñecen que así poden perder audiencia, pero que gañan liberdade e mesmo economicamente (vendendo un 10% do que vendían coas discográficas, acaban gañando máis). Que a industria non espabile e trate de seguir poñéndolle portas ao campo…